Blocher und die plastinierten Leichen an der Spitze

Auch über die Paketpost, die Expo oder die Ski-Nationalmannschaft ergiesst sich der Basler Spott. Aus dem Ausland dominieren zwei Themen: Der deutsche Spendenskandal und die neue österreichische Rechtsregierung.

Körperwelten
Rund 600 000 Personen sahen sich in Basel die plastinierten Leichen und Körperteilen der Ausstellung «Körperwelten» an:
Gseehsch Häärzli, Nierli, Raucherlunge, Bruschtwäärzli, Pfyffli, gräuchti Zunge! S'hett Fingerbeeri, Sportler-Wäädli und Musggelsträng wie Subbe-Fläädli! So hänn mir imme Glaas - ganz unde au s'bruuni Loch - vom Haider gfunde! (Banggo-mat)

Der Groosbappe leen mer blaschtiniere dasch «IN» und billiger als kremiere Denn schyyble mer en wie Wurschtsalat - das got er isch kai Hagere und scho keene mer en als Kunschtobjäggt - im CD-Ständer lagere. (Peperoni)

Die Lyycheschau hät mir no gfalle Doch am Yygang scho sait e lääbigi Schnalle: Für ungfäär glyych vyyl Yydrittsgäld zaig ich no vyyl mee Körperwält (Passe-vite, PS: Schnalle sind in Basel Prostituierte)

National: Post, Sonnenfinsternis, Blocher, Expo, SP-Streit
Nicht immer eine sehr gute Figur machte im letzten Jahr die Schweizer Post:

Jetz gits beraits aafangs Oktoober Wiehnachtssache. Drumm duet my Frau scho denn die erschde Päggli mache. Das nützt mym Göttybueb doch gar nüt, nid im Gringschde. Au soo bringt iim jo d Boscht dass Päggli erscht an Pfingschde. (Singvogel)

E ganz Lääbe lang hän die egglige Sieche verlangt, ass mer e Saili um d Päggli mieche. Hit muesch Glääberli nää, doch wäg em Lyym - kasch der s dängge, blyybe d Päggli ersch rächt im Verdailzäntrum hängge! (Hanslimaa)

Eine noch schlechtere Figur machte allerdings die Expo:

Expo-02, Arteplage. Das Gschyss brnigt mii scho lang in Rage. Et finalement isch s denn sowyt: Le peuple paie le déficit (d Filzluus)

Ich heisse Kataschtrophen-Franz, so wahr ich lebe. Ich kenne Wirtschaft, Politik und Krisenstäbe. Nur etwas weiss ich nicht, und darum meine Frage: Was ischt ums Himmelswillen eine Arteplage? (Singvogel)

Kommentiert wird auch der Streit in der SP:
D SP Schwyz fyyrt e zimlig harti, sälbschtreinigendi Halloween Party E Huffe hooli Kirbiskepf naagle sich an d'Wand und d'Oberhäx - isch unterwäggs - in Richtig Pfäfferland. (Peperoni)

Ain wo in d Zuekunft luegt - isch e Visionär, ain wo si kaputt macht - isch e Divisionär ain wo kai Zuekunft gseet - isch e Pensionär und ain wo kaini het- isch en SP-Partey-Funggzionär! (Hanslimaa)

Die Sonnenfinsternis wurde in Basel wie in Bern beobachtet:
Wo in so gschupfte Brille der Bundesroot luegt, wie der Mond vor d Sunne stoht, sait d Dreyfuess zem Couchepin: «Allez hopp, my Siesse jetz dien mir der Blocher dert uffe schiesse.»

Buure Regle: Do sait der Maa im Mond, dä Schangi: «Wenn der Blocher kunnt, denn gangi.» (Schuufle-Buur)

Wo der Ogi änddligg au verstoot wo d'Sunne bi der Finschterniss aanegoot sait är: «Y bi immer dert wo d'Sunne schyynt - ei ei ei ei dert hinterm Mond liggt Kanderstääg und dert bin ych dehai.» (Peperoni)

Christoph Blocher, aber auch andere Politiker, kommen bei den Schnitzelbänklern schlecht an:

Sogar ych hätt Skrupel und wurd my geniere dr Christoph Blocher z plastiniere wär garantiert mir, dass nach em erkalte är wirgglig wurd sy Schnuure halte. (Fäärimaa)

Im Blääsischuelhuus git d Leererin em Fritzli e Zwai-bis-Dreier zrugg. Do hüült dä zerscht e bitzli Denn rieft er wietig (will jetz stoot er uf der Kyppy): Dasch agscheptier y nit! Wir schehn unsch bei Filippi! (Singvogel)

Blööde Schnuri, Ummeschreyer, Kinderschregg und Myysling Psychopath und Gaiferi, Matscho, Primitivling Luschtmolch, Schandflägg, Bschisser und - dur und dur verschlaage Das alles kasch in ai Wort fasse, muesch nur Bignasca saage. (D'Fätze)

Gesellschaftliches: Sport, Technik und Nella
Während es mit dem FCB wieder aufwärts geht, bleibt die Ski-Nationalmannschaft erfolglos:

Dr FCB das isch e Hit Schuttet wider vorne mit Y wott mi wirglig nid beschwäre Wenn das nur nid alles Zircher wäre. (Tourischte)

Vo däm blöde «Maschendrahtzaun» dien alli reede, was dä «Maschendrahtzaun» bedytet, waiss e jeede. Dä «Maschendrahtzaun» isch nämmlig dä - mir häns verstande - wo d Schwyzer Schy-Kanoone maschtens drin dien lande. (D Käärnebigger)

Von der Technik verstehen vor allem die Jüngsten etwas:

My Sohn, dä isch fünf Jöörli alt und hoggt am Internet Schtunde lang bis z Oobe schpoot, de griegsch en kuum ins Bett dä Bueb ins Näscht z'bekoo - dasch schwiirig, das muesch gseh ha. Är verschtoot, was das betrifft, nur: «www.abinsbett.ch»! (Rätschbääse)

Nach dr Schuel kunnt unser Schnäggli hyylend hai In der Mathepriefig hett äs numme e zwai S isch so guet gange bis Froog 12, derno wirds schwäär Vo dämm Momänt aa isch dr Handyakku läär. (Schnäggedyssi)

Auch die Tessiner Sängerin Nella Martinetti bekommt ihr Fett ab:

Die Nella Martinetti losst mi jetze kalt S sait zue mir doch die Fyyge ych sygere z alt (Dr Gartezwärg)

Bim Doggder Stutz am Sunntig zoobe wird d Nella regelmässig gwooge. «Due gschyder, statt dy Gwicht z verliere als Teletubby mitmarschiere.» (d Filzluus)

International: Österreich, Deutschland, USA
Österreicher Rechtsrutsch und deutscher Spendensumpf sind die dominierenden Auslandthemen:

Die Reaktione uff dä Kohl, sin ungerächt, perfide und hohl Mir gseen in ihm e Vorbild für die Junge und die Alte wenigschtens aimool e Schwoob, wo d Schnuure no ka halte. (Fätzerysser)

Z Eschtryych hänn si jetze laider e Neonazi mit Namme Haider d EU schreyt «Pfui die sind braun wir baun um das Land einen Maschendrahtzaun.» (Aigebreetler)

Mallorca oder Ibiza - au no d'Maledive D'Prospäggtt im Raisebüro sinn - verstaubt und feen a mife Kain will me deert aanegoo - fir sy Honeymoon Alli zieht's nach Eschtryych - deert wirsch am Schnällschte bruun. (Guufekissi)

Nicht immer liebevoll ist aber auch der Umgang mit den USA:

Wo der Clinton no der Pizza und em Turne e Souvernirkiosk entdeckt in Niederurne rieft der Ladechef und kunnt von hinde z gumpe «Verkaufet däm uff gar kai Fall e Rösslistumpe.» (d Zahnstocher)

I ha my Daggeli z Amerika loo miesse, in Kette gleggt muess äs e langi Stroff verbiesse. Äs het im Garte n uss - e Noochber duet s entdegge - em Kööter näbedraa nur schnäll am Fuudi welle schmegge. (Fläädermyys)

Regionales: Wahlen, Urschrey, Fasnachts-Comité
Im Basler Regierungsratswahlkampf standen sich CVP-Mann Carlo Conti und die linke Basta-Kandidatin Rita Schiavi gegenüber. Marc Meyer von der SVP glänzte nicht durch Sachkenntnis:

Nostro Regierig magge jetz per noi Furore Integriere Usseländer nexte Johre Adesso miir wänn au e bisseli befähle kas Carlo Conti oder Rita Schiavi wähle! (d Zahnstocher)

Bim Millionespiil vom Günter Jauch stoot e Basler Kandidaat komplett im Lauch är hett vo nyt e Ahnig, sait numme «Herrjee, y bi dr Marc Meyer vo dr SVP.» (Aigebreetler)

Die Basler Silvesterveranstaltung «Urschrey» wurde mangels Beteiligung zum Reinfall:

Alles finschter, alles schwarz und ringsedum isch Rueh. Nur dr Wind pfifft lylig und e Grabb schreyt ab und zue. Me kennti maine das gäb nur, wenn d wyt in d Wieschti faarsch; Nur z Basel länggts wenn aine gsait het: «Urschrey vorwärts marsch!» (Schwoobekäfer)

Am 11. Auguscht isch nyt passiert Dr Nostradamus het sich aber nid drumpiert E Katastrophe z Basel, jä die gseht er, Mit em Urschrey rund 5 Monet schpeeter. (d Wattestäbli)

Das altehrwürdige Fasnachts-Comité hat sich endlich durchgerungen, eine Frau in den Vorstand aufzunehmen:

I füül mi ainsam und ellai Bi ööbelang ellai dehai Denn statt dehai im Négligé sitzt my Frau im Comité (Passe-vite)

S'Comité änderet minimal s'alt Signet ab - uf gschlächtneutral D'Frau Fasnacht isch ab sofort - kai alti Dante mee... derfir hoggt jetzt e settigi - im Fasnachts-Comité. (Peperoni)

(klei/sda)